Sir Safdar Ali Khan

بیتیغ سپاہی!!

کل شام مسجد فاروق اعظم کے سامنے، ہم کچھ ساتھی، اپنے عزیز دوست صفدر کی نمازجنازہ ادا کرکے سڑک کے ایک جانب کھڑے تھے۔ لوگوں کے اژدہام کے باعث مسجد اور ارد گرد کی جگہ خاصی وسیع ہونے کے باوجود تنگ تنگ ہوئی جارہی تھی۔ حاضرین میں اکثریت نوجوانوں کی تھی جو یقینا” صفدر کے اسٹوڈنٹس تھے۔ انکی بڑی تعداد میں موجودگی صفدر کے لئے ان کے دلوں میں عزت و تکریم اور مقبولیت کو ظاہر کررہی تھی۔ صفدر کا جنازہ اس ہجوم بیکراں کے بیچ سے گزرتا اس بس کی جانب تھا جہاں اسے سخی حسن قبرستان میں واقع اپنی ابدی آرام کی جانب لے جایا جانا تھا۔ ہم سب دوست وہاں صفدر کے بارے میں ہی باتیں کررہے تھے۔ ہر ایک پر اس صدمے کا سایہ نمایاں دیکھا جاسکتا تھا۔ ایسا محسوس ہوتا تھا کہ جیسے ایک ایسی چیز گم ہوگئ ہے جو سب کے لئے یکساں انمول تھی۔ ہرچند کہ مجمع وہاں ہزاروں کا تھا لیکن رونق عنقا تھی۔

بچھڑا اس انداز سے کہ رت ہی بدل گئ

اک شخص سارے شہر کو ویران کرگیا

انہی ملے جلے جزبات کے ساتھ گھر پہنچا۔ افطار کا وقت ہوچلا تھا۔ روزہ کھلنے اور پھر نماز عشاء اور تراویح سے فارغ ہونے کے بعد سونے کے لئے لیٹا تو نیند کو کوسوں دور پایا۔ دل پر ایک بوجھ سا تھا اور پژمردگی سی پورے مزاج پر چھائی ہوئی تھی۔ صفدر کے بارے میں خیالات تھے کے امڈے چلے آتے تھے۔ یکایک، منظر بدل گیا۔ میں چالیس سال پرے چلا گیا۔ میں اپنی NED کے کلاس روم میں بیٹھا تھا۔ صبح کا وقت تھا۔ باقی طلباء بھی آنا شروع ہوگئے تھے۔ اتنے میں ایک لڑکا ،درمیانے قد مگرمضبوط جسم کا مالک کمرے میں داخل ہوا۔ اس نے خاکی پتلون اور سفید بیداغ آدھی آستینوں کی قمیص زیب تن کی ہوئی تھی۔ یہ صفدر علی خان تھے۔ صفدر آتے ہی پنکھے کے نیچے کھڑے ہوتے ہوئے گویا ہوئے، “آج قدرے گرمی ہے۔”  میں نے کہا، “بھائی صفدر،مجھے تو گرمی محسوس نہیں ہورہی۔”۔ اپنی مخصوص ہنسی کے ساتھ بولے، “بھائی، گھر سے پیدل آرہا ہوں۔ اس لئے شائد۔۔۔”۔ وہ تو یہ کہ کر آگے بڑھ گئے اور میں چونک گیا۔ یقین سا نہیں آیا۔ انکے پاس جاکر پھر پوچھا “پیدل گھر سے۔ امے تم فیڈرل ایریا بلاک 13 میں رہتے ہو۔ کیا مطلب ہے بھائی۔”۔ مڑے اور بڑے انداز بے اعتنائی سے بولے “تو کیا ہوا۔ میں تو اکثر پیدل آتا ہوں۔ اچھی ایکسرسائز ہوجاتی ہے صبح صبح۔”۔ بعد میں پتہ چلا کہ موصوف فٹبال کے بھی کافی شوقین ہیں۔ کھیل کا شغف اپنی جگہ، پڑھانے کا بھی شوق تھا جو انہیں اپنے والد محترم سے ورثے میں ملا تھا۔ لہزا میتھس کی ٹیوشنز وہ اس وقت بھی دیا کرتے تھے۔ کھیل، پڑھائی اور پڑھانا سب ساتھ ساتھ چلتا رہا۔ NED کی تعلیم سے فارغ ہوئے۔ سب اپنے اپنے قسمت آزمائی کے لئے مختلف جگہوں کے لئے نکل گئے۔ ہم بھی کئی برس کے لئے شہر کراچی سے باہر رہے۔ جب واپس آئے توصفدر اب سر صفدر بن چکے تھے۔ بالوں میں کافی سفیدی آچکی تھی۔ ریاضی پڑھانے میں وہ کراچی میں اپنا ایک مقام بنا چکے تھے اور “سر صفدر کوچنگ سنٹر” کو کامیابی سے چلا رہے تھے۔ ایکدن میں نے انہیں اپنے بھتیجے کے لئے فون کیا۔ میں چاہتا تھا کہ وہ میرے بھتیجے کو اپنے کوچنگ سینٹر میں داخلہ دے دیں۔ انہوں نے بڑی خندہ پیشانی سےنہ صرف میری درخواست قبول کی بلکہ اس بچےکوتعلیمی سال کے کچھ ماہ گزرنے کے باوجود اپنے سینٹر میں داخلہ دے دیا۔

ایک دفعہ کہنے لگے فرخ بھائی شاہد امریکہ سے آیا ہوا ہے۔ میں نے لال قلعہ میں کچھ دوستوں کو مدعو کیا ہے۔ آپ بھی آئیے گا۔ دوسری مرتبہ سہیل اور ناہید کی آمد پر انہوں نے مجھے لال قلعے میں ہی رات کے کھانے پر مدعو کیا۔ میرے صفدر سے باہمی تعلقات پروان چڑھتے رہے۔ 

مئی 2015 کی بات ہے،  میرے تایہ زاد کا انتقال ہوا۔ قبرستان سے واپسی تک رات ہوگئی۔ میں انکے گھر کے باہر تعزیت کے آنے والے لوگوں سے مل رہا تھا۔ دیکھا تو تھوڑے فاصلے پر صفدر ٹہلتے ہوئے آرہے ہیں۔ ہم دونوں ایک دوسرے کی موجودگی پر حیران تھے۔ میں نے اپنی موجودگی کی وجہ بتائی۔ وہ بولے “فرحت علی (میرے مرحوم تایہ زاد) میرے پرانے جاننے والے تھے۔ مجھے کبھی پتہ ہی نہیں چلا کہ یہ تمہارے بھائی تھے۔” کچھ توقف کے بعد استفسار کیا کہ پھر تو پرویزجمال بھی تمہارے بھائی ہوئے کیونکہ وہ فرحت صاحب کے چھوٹے بھائی ہیں۔ میں نے اثبات میں سر ہلایا توبولے کہ پرویزجمال تو میرے والد مرحوم کے بہت پرانے دوستوں میں سے تھے۔ اس ملاقات نے میرے اور صفدر کے درمیان تعلقات کی ایک اور ڈوری باندھ دی۔

جون 2016 میں رمضان کے روزے تھے۔ تراویح کے بعد گھر پہنچا توایک پریشان کن خبر آئی کہ صفدر کی طبیعت ٹھیک نہیں۔ کینسر diagnose ہوا ہے۔ اگلے دن اسکی سرجری ہے اور غالبا” اسکی ایک کڈنی remove کردی جائے گی۔ خبراتنی غیرمتوقع تھی کہ یقین نہ آتا تھا۔ شدید بےچینی کے عالم میں صفدر کو فون کیا۔ خود اس نے ہی فون ریسیو کیا۔ آواز میں وہی کھنک اور سکون۔ میں نے خبر کی تصدیق چاہی۔ انہوں نے نہ صرف تصدیق کی بلکہ انتہائی تسلی والے لہجے میں بولے کہ یار کوئی بات نہیں۔ بس ایک چھوٹی سی سرجری ہے۔ انشاءاللہ جلد گھر واپس آجاوں گا۔ لیکن مجھے تسلی نہیں ہوئی۔ میں اسی وقت، اپنی بیگم کے ہمراہ لیاقت نیشنل ہاسپٹل پہنچ گیا۔ وہاں صفدر کے ساتھ انکے اہل خانہ اور چھوٹے بھائی ڈاکٹر اختر بھی موجود تھے۔ اسنے پوری تفصیل سے اپنی علالت کے بارے میں بتایا۔ صفدربہت پراعتماد نظرآرہے تھے ۔ ان کی باتوں سے انکے صبر، تحمل اور اللہ کی رضا میں راضی رہنے کا واضح پتہ لگ رہا تھا۔

اب میں صفدر کو ہر تھوڑی مدت کے بعد فون کرنے لگا۔ میری بیگم بھی بیگم صفدرسے گاہےبگاہے بات کرکے خیرخیریت دریافت کرلیتی تھیں۔ کبھی کبھار، ہم انکے گھر بھی جانے لگے۔ ایکدن سہیل نے مجھے فون کیا۔ انہوں نے مجھ سے صفدر کے ہمراہ NED Scholars کے 2017 انٹرویوسیشن میں حصہ لینے کو کہا۔ میں پروگرام کے مطابق NED  پہنچا۔ صفدر، عارف خان اور انجم شریف بھی موجود تھے۔ اس سیشن کے ختم ہوتے ہوتے ڈیڑھ بج گیا۔ ہم سب نے وہیں NED کی مسجد میں نماز پڑھی۔ صفدر بولے، “آپ سب میرے ساتھ چلیں، کسی ریسٹورنٹ میں کھانا کھاتے ہیں۔” اصرار کرکے لاثانیہ میں لے کر گئے اور ہر ایک کو ادائیگی سے بھی روک دیا۔  صفدراس محفل میں بہت خوش نظر آرہے تھے۔ اس دن انٹرویوز شروع ہونے سے پہلے، صفدر نے مجھ سے کہا کہ، “میری طبیعت کا کچھ پتہ نہیں ہوتا۔ کس وقت زیادہ خراب ہوجائے۔ میں نے سہیل سے بھی اپنی اس معزوری کا اظہار کیا تھا۔ میں اب اپنے آپ کو اس قابل نہیں پاتا کہ میں وعدہ کئے گئے وقت کے مطابق اس کام سے عہدہ براء ہوسکوں یا اب آگے کوئی زمہ داری اٹھا سکوں۔” یہ اطلاع سہیل مجھے پہلے دے چکے تھے۔ لیکن صفدر سے براہ راست سنکریہ بات مجھے پریشان کرگئ کیونکہ یہ میرے اس خیال کی تائید کررہی تھی کہ اسکی صحت اتنی اطمینان بخش نہیں جتنا وہ بظاہرپرسکون نظر آتا ہے کیونکہ وہ اللہ کا شکر کرنے والوں میں سے ہے۔ اگر وہ اپنی بیماری کا شکوہ نہیں کرتا، تو یہ اسکا صبر ہے۔

ایک دفعہ سہیل کا بہت پریشانی میں فون آیا۔ کہنے لگے، “فرخ آپ سے ایک فیور چائہیے تھا۔ وہ NED Scholars کی مد میں کچھ رقم صفدر کے پاس ہے، آپ اس سے لیکر فلاں صاحب کے حوالے کردیں۔” میں نے کہا کوئی مسئلہ نہیں، میں کرلوں گا۔” سہیل بولے،” نہیں بھائی فرخ، یہ کام اولین ترجیح پر کرنا ہے۔ کل صبح صبح۔ وہ دراصل، صفدر کہتے ہیں کہ یہ رقم امانت ہے اور میری صحت اب اس قسم کی تفکرات کی اجازت نہیں دیتی۔ سہیل، آپ یہ زمہ داری فورا” بلکہ آج ہی کسی کو تفویض کردیں۔ میرے ذہن سے بوجھ اتر جائے گا۔” لہذا، اگلی صبح، صفدر سے وہ رقم لیکر، سہیل کے دئیے گئے پتے پر پہنچادی گئی۔

 2019کے دن تھے۔ صفدر نے مجھے فون کیا اور پوچھا کہ، “کیا آپ گھر پر ہیں۔؟ میں اور میری بیگم آپ کے گھر آنا چاہتے ہیں۔” میں نے کہا بصد شوق۔ تھوڑی دیر میں وہ اپنی بیگم کے ہمراہ خود گاڑی ڈرائیو کرکے پہنچے۔ اپنے پوتے کے پیدا ہونے کی خوشی میں مٹھائی لیکر آئے تھے اور ہمارے بیٹے کی شادی کی بات طے ہونے پر مبارکباد بھی دینی تھی۔ اس طرح اسنے ہمیں اپنی خوشی میں اور اپنے آپکو ہماری خوشی میں شریک کیا۔ اس ملاقات میں، میں نے اسکے چہرے پر خاصا ورم دیکھا، جو ایک پریشانی کا باعث تھا۔ میں نے ان سے اسکا سبب نہیں پوچھا۔ لیکن باتوں باتوں میں،وہ خود ہی اپنے چہرے پر ورم کی وجوہات بتانے لگے، جس میں انہوں نے اس اصل بیماری کو بری الزمہ قرار دیا۔ یہ انکا تجاہل عارفانہ تھا۔  اس ملاقات میں، صفدر نے انتہائی محتاط، دھیمے مگر تفصیل سے بتایا کہ کیموتھراپی کے بعد اسکی کیا طبیعت خراب ہوتی ہے جسکی وجہ سے وہ اکثر جگہوں پر اور تقریبات میں جانے سے پرہیز کرتا ہے۔

ابھی اسی رمضان میں، میری بیگم نے، بیگم صفدر کو فون کرکے خیرخیرئیت دریافت کی تو انہوں نے دعا کی درخواست کی۔ جس سے اندازہ لگانا مشکل نہ تھا کہ صفدر کی طبیعت تشویشناک حد تک خراب ہے۔ اسکے لئے، نمازوں کے بعد، دعا کا اہتمام کرتے رہے۔ لیکن اللہ کو کچھ اور ہی منظور تھا۔ اسکا بلاوا آچکا تھا۔ جسکا خدشہ تھا وہی ہوا۔ 6 مئی کو 11:54 بجے گروپ میں سہیل کا وہ میسیج آگیا جسکا ہر لمحہ دھڑکا لگا تھا۔ ہمارا دوست، ہمارا بھائی، ہمیں چھوڑ گیا تھا۔ اسکی سواری ملک عدم کو روانہ ہو چکی تھی۔

اناللہ وانا الیہ راجعون

دفعتا” سحری کا الارم بجا جس نے اس یادوں کی بارات کا تانتا توڑ دیا۔ دل پر پژمردگی اور بوجھ بڑھ چکا تھا۔ قرار تھا کہ آنے کا نام نہ لیتا تھا۔ دفعتا” میرے مولا نے کرم کیا۔ مجھے شرح صدر ہوا۔ میرے اندر سے گویا آواز آئی کہ، “تم اتنے مضمحل کیوں ہو؟ کیا تمہیں اس بات کا غم ہے کہ صفدر کو ابھی نہیں جانا چائہیے تھا؟”

میں نے کہا، “نہیں، باری تعالی کے یہاں، ہر ایک کے بلاوے کا وقت مقرر ہے۔”

پھر سوال ہوا،”کیا تمہیں اسکی مغفرت کی فکر ہے اور کیا تمہیں اسکے جنت کے عطا ہونے پر کوئی خدشہ ہے؟”

میں نے جواب دیا کہ، “نہیں۔ مجھے اللہ کی رحمت سے پورا یقین ہے کہ اسکے ساتھ اللہ تعالی رحم فرمائیں گے اور جنت میں اعلی مقام عطا کریں گے۔”

پھر سوالوں کا ایک سلسہ ہوا،

 “کیا تم نے اسے امانت دار پایا؟” میں نے کہا جی ھاں۔

“کیا تم نے اسے عہد کا پابند پایا؟” میں نے کہا جی۔

“کیا تم نے اسے حلقہ یاراں میں نرم گو پایا؟ میں نے کہا جی۔

“کیا تم نے اسے اللہ کی رضا میں راضی پایا؟” میں نے کہا جی۔

“کیا تم نے اسے ہر حال میں اللہ کا شکر کرتے پایا؟” میں نے کہا جی۔

“کیا تم نے خاص طور پر اپنی بیماری کے دوران صابر پایا؟” میں نے کہا جی۔

“کیا تم نے دیکھا کہ وہ علم کی ایک شاخ کو کتنی جانفشانی سے پھیلانے کا سبب بنا؟ میں نے کہا جی۔

“کیا تم نے اسے اپنی روزی کو حلال کرتے پایا؟” میں نے کہا جی۔

“کیا اس نے اللہ کے مجبور بندوں کی کسی درجہ مدد کی اور معاونت کی؟” میں نے کہا جی۔

“کیا اسنے اپنی ضعیف اور بیمار والدہ کی تن، من اور دھن سے خدمت کی اور اسکا حق ادا کیا؟” میں نے کہا جی۔

“کیا اسنے اپنی اولاد کی حتی المقدور بہتر تربیت کی اور انکو حلال نوالہ کھلایا؟” میں نے کہا جی۔

“کیا اسنے ہزاروں طلباء کو زیور علم سے اس طرح آراستہ کیا کہ وہ اب معاشرے کا ایک مفید اور منفعت بخش حصہ بن گئے؟ میں نے کہا جی۔

“کیا اسکے اہل خانہ،حلقہ احباب، اڑوس پڑوس، اعزاء، اقرباء، طلباء کی اکثریت اسکے بارے میں اچھی رائے رکھتے ہیں؟ میں نے کہا جی۔

“کیا اسکی اس بیماری کے سبب اسکی موت نے اسکو شہادت کے ایک درجہ پر سرفراز نہیں کیا؟ میں نے کہا جی۔

مجھے لگا کہ صفدر اقبال کا وہ مومن سپاہی تھا جو بغیر تیغ کے چومکھی لڑائی لڑ رہا تھا۔

پھر اندر سے ایک آواز آئی کہ “جب تم نے ہر بات کا جواب اثبات میں دیا ہے تو کیا تمہیں اللہ کی رحمت پر کوئی شک ہے؟” میں نے کہا ہرگز نہیں۔ اللہ تعالی غفار ہے، رحمن و رحیم ہے۔” 

“تو پھر یقین کرلو کہ وہ انشاءاللہ فلاح پاگیا اوراسکے مقرب بندوں میں شامل ہوگیا۔ تمہارا دل کیا کہتا ہے؟” میں نے کہا کہ وہ جو ابھی ابھی اللہ نے مجھے القاء کیا ہے۔ آواز آئی کہ “جب نیت خالص ہو، سمت درست ہو تو دل میں اللہ ہی ہوتا ہے۔”

میری آنکھوں میں خوشی سے آنسو نکل آئے۔ ایک اطمینان کی لہر دل میں اتر گئی۔ بےچینی، غم اور پژمردگی کے اندھیرے کی جگہ سکون، اطمینان اور مسرت کے اجالے نے لے لی۔

میں نے سحری کی، وضو کیا، فجر کی نماز ادا کی اور اللہ سے انتہائی خشوع و خضوع سے دعا کی کہ، “یا باری تعالی تو اپنی خاص رحمت اور کرم سے ہمارے پیارے دوست صفدرعلی خاں کی مغفرت فرما۔ اسکی ہر ہر کوتاہی اور لغزشوں سے درگذر فرما۔ اس کے درجات بلند فرما۔ جنت میں اعلی مقام عطا فرما۔ اور جو سکون و اطمینان اورصبر مجھے آیا ہے، اس سے کہیں زیادہ درجہ کا قرار و صبر اسکے اہل خانہ کو اس یقین کے ساتھ دے کہ صفدر اب کہیں بہتر مقام اور حال میں ہے۔ آمین۔”

تحریر۔۔ سید فرخ جمال

---

یارو کچھ تو کرو کہ بزم سمٹتی جاتی ہے
آنکھوں میں سمو لو بچے منظر کہ بزم سمٹتی جاتی ہے

کوئی اکیلا نہ رہے یکجا ہو چمن میں ایسے
کل کو یہ دکھ نہ رہے کہ بزم سمٹتی جاتی ہے

Zafar Ali

---

ہ صفدر! .. بالآخر اپنے سفر آخرت پر روانہ ہو گیا .. بہت پیارا انسان .. یہ گواہی تو یہاں سبھی دے رہے ہیں .. اور جب ایسا ہو تو امید ہے جنت واجب ہو گئی .. إن شآءاللہ ..

اللہ سبحانہ و تعالیٰ صفدر مرحوم کی کامل مغفرت فرمائے اور پسماندگان کو صبر جمیل عطا فرمائے۔

صفدر کو ہمیشہ پرسکون پایا .. مجھے بھی اس نے ایک مرتبہ اپنا سینٹر بڑی تفصیل سے دکھایا تھا .. بعد میں بھی فون پر اس سلسلے میں بات ہوئی ..

وہ جو ہم تم میں نہیں خاک میں پنہاں ہو کر

Anjum Shareef

---

ایک اور دوست رخصت ھوا، نہایت ھمت والا اور ھار نا ماننے والا۔ چلڈرن ھوم اسکول سے میرا ساتھی۔ ھمیشہ سے ملنے اور ملانے والا۔ پڑھانے کے نت نئے طریقے روشناس کرنے والا۔ اللہ تعالی صفدر کو جنت الفردوس میں اعلی مقام پر فائز کرے اور گھر والوں کو صبر کرنے کا حوصلہ۔ آمین

Zafar Kamal

---

کیا تعزیت کروں اور کیا پرسہ دوں۔۔۔ اللہ ہمارے بھائی کی مغفرت فرمائے اور اس کے درجات بلند کرے۔ آمین۔۔۔ اللہ سب گھر والوں کو اور سب لواحقین و احباب کو صبر اور حوصلہ دے آمین۔
احمد صفئ

---

 Dua-e-Madfarat on Facebook